Aukeratu dira dagoeneko Kimuak 2013ko katalogoa osatuko duten zazpi film laburrak

Zazpi dira Kimuak zigilupean aurten banatuko diren film laburrak, aurkeztutako 75 proposamenen artean emandako epaiaren arabera.

Aurtengo epaimahaia osatu duten kideek, hots Maialen Beloki –Donostia Zinemaldiko Hautespen-batzordeko kidea eta Zinemira, Made in Spain eta Zinema Ikasleen Nazioarteko Topaketa atalen Arduraduna–, Josemi Beltrán –Donostia Kulturako Zinema Arduraduna–, Lourdes Fernández –AlhondigaBilbaoko Zuzendaria–, Fernando López de Castillo –Vitoria-Gasteiz Film Officeko zuzendaria eta zinema zuzendaria– eta Inguma Martínez –ETBko albistegietako Kultura Arlo-burua–, aurkeztutako film laburren maila altua eta hauen artean zazpi baino ez aukeratzeko zailtasuna azpimarratu dute.

Honako film laburrek osatuko dute Kimuak 2013 katalogoa: Lander Camareroren A POLITICAL STORY, Aritz Morenoren CÓLERA, Borja Cobeagaren DEMOCRACIA, Izibene Oñederraren HOTZANAK, Raúl de la Fuenteren MINERITA, Aitor Iturriza eta Bernat Gualen UNA HORA, UN PASO eta Asier Altunaren ZELA TROVKE.

Aurtengo aukeraketa Kimuaken aurrez egon diren lau zuzendarik eta beste lau berrik osatzen dute, eta hiru genero nagusiak jasotzen ditu, dokumentalaren presentzia azpimarragarriarekin.

A Political Story Lander Camarero bilbotarrak zuzendutako dokumental faltsua da. Lauren C. Carroll, New York Film Instituteko ikaslearen ikasketa amaierako proiektutik abiatu eta Palestina NBEan Estatu Behatzaile bezala onartzeko zenbait herrialdek emandako aurkako botoa hartzen du oinarri.

2011 urtean What About Columbus dokumentala zuzendu zuen Lander Camarerok, eta honen parte den Jose Mari Goenagaren Lagun Mina urte bereko Kimuak katalogoan izan zen.

Aritz Moreno donostiarrak hirugarren film laburra du Kimuaken, 2008an Cotton Candy eta 2011ean Bucle izan ostean. Oraingoan, Richard Corbenen Terminated (Exterminio) komikian oinarritutako Cólera film laburra aurkeztu du, herri batek bere gaitza ezabatzeko saiakera kontatzen duena.

Borja Cobeaga zuzendari donostiarrak ere errepikatzen du egitasmo honetan, bostgarren aldiz bere kasuan. La primera vez (2001), Éramos pocos (2005), Limoncello (2007) eta Un novio de mierda (2010) lanen zuzendariak Democracia film laburra egin du oraingoan, sistema politiko honen gaineko komedia karmikoa.

Hotzanak, For Your Own Safety Izibene Oñederra azkoitiarraren hirugarren animazioa da Kimuaken, 2007an Hezurbeltzak eta 2008an Berbaoc izan ostean, azken hau Artelekuko Mugimenduzko irudi laborategian beste zenbait artistekin batera egindakoa.

Hotzanak filmak kontrolak identitate pertsonalaren gainean duen eraginari buruz hitz egiten du, edozein norbanako gaizkile bihurtu daitekeela adieraziz.

Raúl de la Fuenteren Minerita aurtengo katalogoa osatuko duten lau dokumentaletako bat da, Kanaki Films Gipuzkoako etxeak ekoiztua. Boliviako meatze-gune bateko emakumeek egunero jasan beharreko arriskuen gaineko testigantza da iruñearraren lan hau.

Nomadak TX filmaren egilea da Raúl de la Fuente, eta 2012an zuzendutako Virgen Negra laburra Goya Sarietako finalista izatera iritsi zen.

Una hora, un paso dokumental fikzionatua, Aitor Iturriza donostiarrak Bernat Gual mallorcarrarekin batera ESCACeko Zuzendaritza Masterrean zuzendutako proiektua izan da. Juan José González Beltrán preso ohiaren istorioa kontatzen du, Egipton heriotza zigorra jaso zuena.

Azkenik, Asier Altunaren dokumentalak Zela Trovke aspaldiko abesti eslovakiarrari buruz dihardu. ‘Moritat’ izenez ezagutzen den generoko abestiek erailketa baten narrazioa egiten dute.

Bergarako zuzendariaren bost film labur izan dira jada Kimuaken: Txotx (1998) eta 40 ezetz (1999), Telmo Esnalekin batera eginak, eta Topeka (2002), Sarean (2006) eta Artalde (2010), bakarrean zuzenduak.

Katalogo berria datorren irailean aurkeztuko da ofizialki, Donostia Zinemaldian.